કોઈ જાતું હળવે હળવે કોઈ ઘાએ ઘા
તું તારી રીતે જા
તને ગમે તો આ પા જાજે , અથવા પેલી પા
તું તારી રીતે જા
બંધ ઓરડા કદી ન ઝીલે કો શ્રાવણની હેલી
ઊલટ થાય તો ખોલી દે તું તારા ઘરની ડેલી
દોર મૂકજે બજાર વચ્ચે દેહ ઉઘાડો મેલી
ને ફરી ફરીને ન્હા
હોય અજાણ્યા કે જાણીતા - છતાંય મલકે હોઠ
રોજ ધૂળેટી ઊજવીએ માગી નજરની ગોઠ
હળ્યા મળ્યાં તો ઘેર ઊતરશે અવસરની કૈ પોઠ
રે ઉતાવળો કાં થા ?
કોઈ બાળકે ફૂલ ચીતરતાં મ્હોરી ઉંથી ભીંત
પતંગિયાને કોણ શીખવે છે ઉડવાની રીત ?
કોયલને ક્યાં કહ્યું હતું કે ગા ફાગણનું ગીત ?
તું મન ફાવે તે ગા
તું તારી રીતે જા.
~ મનોહર ત્રિવેદી
No comments:
Post a Comment